ليلى و الذئب 2008
حكاية من التراث الشامي المودرن
يــوم ربيعي جميل ليلى عم تتمشـــى
رايحة لعند تيتــا تاخدلهـا شوية اكـــل لانو سمعت انو مريضة و ع الطريق شافت ذئـــب كلاس واقف عند الشجرة
و كان الحـــــــــوار التالي
الذئب : بونجور يا قطـــة
ليلى : يا فتاح يا عليـــم يا رزاق يا كريـــم بوش مين اتصبحت اليوم انــــا
الذئب : السلام لله يا عســل دخيلو انــا الخجلان ردي علينـا بكلمـة
ليلى : ترد عليك البلاطــة خير نعــم شو بدك من عبكرة الصبــح
الذئب : طيب خدي و اعطي معي بالكــلام شو اسمك يا حلوة
ليلى : انا اسمي ليلى و بينادوني بالبيت لولو
الذئب : لك عاشت الاسامي يا ام اللول بتعرفي انو قلبي حاسسني انو اسمك ليلى لان انا بحبو لهالاسم من جوات قلبي و انا اسمي الذئب و بينادوني ابو الزوز
ليلى : ميرسي تحبك العافية .. تشرفنا .. ممكن تبعد شوي بدي امرق اتاخرت لانـــو
الذئب : اي مو على عيني .. شبكي لسه عم نتعرف ليش هيك بسرعة طاش حجرك.. طيب شو معك بالسلة لولو
ليلى : كرواسان و تشيز كيك و كورنفليكس
الذئب : لك تطلعي ع قبري اي قولي امين .. بتعرفي انا روح قلبي الكورن فليكس
ليلى : بردون .. اسفة بس هدول لتيتا مو قلك
الذئب : لك ولي على طولي و بتحكي انكليزي كمان طيب لولو وين بيت تيتـا انا معي ميرسيدس كشف حمرا بوصلك بعيوني ع بيت تيتـا و بالمرة بنشربلنا سوا فنجانين هوت شوكليت و بسمعك غنية راغب علامة الجديدة
ليلى : انا ما بحبو لراغب .. انا بحب فارس كرم
الذئب : و انا بطلت حبو لعيونك بس ما قلتيلي وين بيت تيتــا
ليلى : بجهنم الحمــرا
الذئب: خلص خلص روحي عمو الله يسهلــك
